Woensdig 14 september

Öm 21.16 oor geit d’n tillefoon; “ ‘t Waas emes van de Kook”, reep ich nao Ella. “Volges mich waer ich prins of wat zulle ze mótte?” Dus ich noom d’n tillefoon op en drek kreeg ich de vraog of ich prins wil waere? ‘t Antwaord waas netuurlik: “ ‘nen druim kump oet!” Nao efkes babbele vroog dae persoeën of ‘t good waas det ze efkes langs kwame en 15 menute later sjtónge 2 man veur de deur. ‘n Klein bietje waas ’t doorgedrónge, mer ‘t besef waas d’r nag neet gans. Ich kreeg ’t d’r erg werm van. Zelfs zoeë werm det ich mer efkes nao baove mósde gaon öm ‘n anger shirt aan te trèkke. D’r kwame netuurlik ‘ne hieëlen houp vraoge nao baove. Wie gaon ich det allemaol doon nów mèt de kleine, as dae gebaore is, want den is dae pas 6 waeke aod. Mer alles kump good, dach ich. Ella waas ’t d’r gelökkig ouch gans mei ens en zoeë meug ich den Prins waere. Wat ‘n groeëte ieër zeg, van zón sjoeën dörp as Baolder Prins te meuge zien!

De ieërste opdrach waas ‘t trio compleet make. Same mèt Ella waas ich d’r sjnel oet: Tom van den Heuvel en Sander Bongers.

Dónderdig 15 september

Versjillende kieëre Sander perbere te belle en te appe. Oeteindelik Imke gebeld en kreeg ich Sander den toch te pakke. De vraog waas of Sander efkes langs wooj kómme en öm 22.37 waas hae beej ós. Weej gaon ieërs efkes Imke belle en Sander sjnapde d’r gaar niks van. Imke oppe luidspraeker gezatte en toen kwaam de vraog: “Wils se adjudant waere van Prins Daan I?” Hae antwaorde drek mèt JAO. Wat ‘n sjpanning, want dit vóng ich toch gèt angers den dien vrouw ten huwelik vraoge. Beej Ella wis ich toch wel det ze JAO zeuj zègge en beej Sander wis ich ’t neet zeker.

Zaoterdig 16 september

Sander, Imke, Ella en ich sjtónge öm 18.00 oor beej Tom en Femke oppe sjtoep. Weej ginge gezellig oppe bank zitte en Tom en Femke begóste euver eur geweldige vekansie te praote. Nao ‘n tiedje, toch mer ‘ns van óngerwerp verangerd. Ich begós ‘t verhaol ‘n bietje sjpannend te vertelle, mer beej Tom lande ‘t nag neet. Wies det ich de vraog sjtelde: “Wils se adjudant waere van Prins Daan I?” Tom zag ouch drek JAO zónger ‘t mer efkes mèt Femke d’r euver gehad te höbbe.

Trio is compleet: laot de vastelaovend mer kómme! Saoves höb ich drek de Kook gebeld öm te melde det ‘t trio van 2017 compleet is.

Zóndig 25 september

De ieërste vergadering mèt de prinsecommissie waas öm 20.30 oor gepland. Ieërs woord idderein perficiat gewinst, daonao begós ós vergadering.

Weej krege behuuerlik gèt info euver ós haer en mèt flink gèt beer en Radler verleep ós vergadering good en zoeë kóste weej öm 00.25 oor aafsjloete. Nów wuuert ‘t wel allemaol hieël ech, besefde ich mich. Toch lastig öm de mónk te haoje as se zoeë gelökkig bös des se Prins wuuers.

Maondig 3 oktoeëber

De ieërste echte vergadering same mèt ‘t trio en de vruiwkes. Femke hei sjoon besjtèld. Idderein meugde de sjooon efkes passe. Oeteindelik is d’r ‘n sjoeën zjwart sjunke oetgekómme. Weei höbbe dezen aovend doorgenaome wat weej doon mèt de medalies. Daonao kwaam ós motto aan de beurt. Weej heie allemaol al efkes naogedach en weej zien d’r bienao oet, weej höbbe nag 2 motto’s euver.

Vriedig 7 oktoeëber

Proefmedalies zien binne, weej kènne ‘n keus gaon make.

Dónderdig 13 oktoeëber

Weej zien d’r oet watfer medalie weej aan gaon sjaffe.

Maondig 17 oktoeëber

Ze zien begós aan de scepters.

Dónderdig 20 oktoeëber

Weej ginge vandaag ózze smoking passe. Det heie ze beej de Kook toch nag neet dök mei gemaakt: ‘n trio det d’r zoeë sjlank en goddelik beej sjtóng. Nao ‘t passe zien weej nag efkes de kroeg in gegaon en höbbe weej d’r nag ‘ne gezelligen aovend van gemaakt.

Dónderdig 3 november

De scepters zien klaor. ‘t Kump allemaol sjtieëds dichter beej de vastelaovend.

Woensdig 9 november

‘t Wielrenframe is besjtikkerd. Medalies zien binne gekómme. Wat ‘n gewich zeg, zón pekske mèt zoevuuel medalies. Dónderdig 10 November Sjtaeke zien binne en de prinsemuts is dus ouch klaor

Vriedig 11 November d’n 11de van d’n 11de

Sjmorges höbbe weej d’m breef van de Prins van 2016 gekrege en mèt vuuel plezeer deze gelaeze. Öm 11 oor sjtónge Ella en ich same gans verkleid en geschminkt veur ‘t sjtadhoes in Venlo öm same d’n 11de van d’n 11de te gaon viere. Weej höbbe wer flink gezónge en genaote van de meziek. Volges mich weite ze in ‘t dörp nów det ich Prins waer, want de vrouw van de Prins van aafgeloupe jaor vroog aan mich: “Wie veult ‘t öm heej vastelaovend te viere as Prins van 2017?” “Ich veul mich heej neet prettig beej”, antwaorde ich. Ich dach namelik det ‘t de vrouw waas van ein van de manne van de prinsecommissie. Zeej begós ouch nag sjtieëds helder te rope det ich Prins zeuj waere. Ich wis mich gèn haojing te nimme mèt zoevuuel Baolderse vrouwe öm mich haer. Helaas of gelökkig mósde ich öm 17 oor gaon wèrke. Sjlech niejs: de boerebroelef geit neet door.

Zaoterdig 12 November

Donateurskaarte gekoch.

Maondig 14 November

De wielrenfiets is ouch gans klaor. Wat ‘n gaaf dink is ’t gewaore!

Dónderdig 17 November

Ózze smoking is binne.

Zaoterdig 19 november

Öm 19 oor woorte weej verwach öm foto’s te gaon make, ónger angere veur op de poster.D’n auto waas ech knats en knatsvol gelaje mèt drank en attribute. Weej höbbe daen aovend ech wie fotomodelle dao veur de camera gesjtaon. Wat waas ‘t lache daen aovend. Daonao höbbe weej nag flink geborreld en Sander kós ‘t efkes allemaol neet binne haoje, haha.

D’r höbbe zich twieë groepe gemeld veur de boerebroelef.

Zaoterdig 10 december

Dao is den ózze nieje Prins van de femilie: Teun Bongers d’n ieërste.

Maondig 1 jannewari

Weej höbbe de facebookpagina gekrege en geliek deze aangepas nao ózze wins. En idderein de bèste winse euvergebrach netuurlik.

Zaoterdig 14 jannewari

Mèt de femilie nao Zuid-Limburg gewaes öm dao grei te haole öm ‘t hoes te gaon versiere. Weej ginge mèt behuuerlik get grei nao hoes.

Zóndig 15 jannewari

De maedjes zien wer begós mèt eur pekskes, ‘t eindresultaat kump in zich. Wat is ‘t toch ouch allemaol sjpannend. Aafgeloupe waek is miene naam al ‘n paar kieër geneumd in dörp. Ich dörf mich bienao neet mieër te vertuuene. Ech lestig de mónk zoelang toe te mótte haoje! Wat höb ich d’r ouch ‘n zin in! De vastelaovesmeziek sjteit ech idderen daag aan en Lars is ouch behuuerlik aan ‘t oefene.

Dinsdig 17 jannewari

Vandaag nag ‘ns nao de zaak gewaes wao we ós smokings höbbe besjteld öm veur d’n derde kieër ‘n bóks aan te maete. Gelökkig leep ich later mèt ‘n gój bóks de deur oet, ein die mich good zit en waomei ich duchtig kèn fieëste.

Vriedig 20 jannewari

Vandaag ‘n sjpandook besjtèld van 3 maeter x 2 maeter. Mer veurdet se det haes besjtèld gebeurt d’r van alles. Ich hei ieërs ‘n foute besjtèlling gedaon dus belle mèt eur öm de besjtelling te annulere, det gebeurde. Dus efkes opnie, waas bienao aafgerónd, betaald hei ich al. Ich heufde allein te bevestige en opens veel de computer oet. Nao ‘n tiedje hei ich de computer wer aan de geng. Sjnel de besjtelling bevestige, mer det lökde neet ech. Dus wer efkes belle mèt dae man van de site, perbeerde ich in mien account te kómme mer det lökde mer neet. Nao lang belle woort ich ‘n bietje geïrriteerd want ich hei toch det geld al euver gemaakt?! Mer daonao zag dae man aan de lien: “Zits se wel oppe gójje site?” Det bleek van neet… Daonao waas de besjtèlling sjnel aafgerónd.

Zaoterdig 21 jannewari

Letste vergadering nag efkes get puntjes aafwèrke:
- bellies aafmake
- borrel veur de 29ste besjpraeke
- proklemasie goodkeure
- daagbook doornimme
- vraogelies Hallo doornimme en efkes höbbe weej ‘t nummer van Kook van eige Deig gezónge.

Zóndig 22 jannewari

Ich begin krank te waere, duchtig verkaod en ich bön d’r neet good aan mer aevegood efkes nao de vastelaovesmert in Blierick gewaes in ‘t Raodhoes.

Zaoterdig 28 jannewari

Zoeë, vandaag is den d’n daag wao weej as trio lang nao toe höbbe gelaefd. ‘t Geit vandaag ech beginne. Ieërs nag efkes ‘n rónkleiding beej de brankwaer gegaeve aan de jeug van MTB Baolder en ‘ne fietsclinic beej ós in de bös öm ‘n bietje aafleiding te zeuke. Daonao höbbe weej beej Sander thoes nag de graasj versierd veur ‘t fieës van morge. Euver 2 eurkes is ‘t den zoewiet, weej zien d’r klaor veur!

Agenda

Vastelaovend 2019 3, 4 en 5 Mieërt
  • Zaoterdig 13 Oktoeëber KVED totaal
  • Zaoterdig 11 November Insjete Vastelaovend
  • Zaoterdig 17 November, Café Centraal, CD prissentasie en kaarteverkoup pronkzitting
  • Zaoterdig 15 December Hierezitting
  • Vriedig 1 Fibberwari Jeugprinsebal
  • Zaoterdig 2 Fibberwari Prinsebal 20.11 oor
  • Zondig 3 Fibberwari Donateurskaarte verkoup tot en met 11 Fibberwari
  • Vriedig 8 Fibberwari Prónkzitting 20.00 oor
  • Zaoterdig 9 Fibberwari Prónkzitting 20.00 oor
  • Zaoterdig 16 Fibberwari Seniorezitting Unitas
  • Zaoterdig 23 Fibberwari Boeremoosbal
  • Zondig 24 Fibberwari Kranteverkoup
  • Vriedig 1 Mieërt Sjoëlebezeuk, aansjloëtend programma
  • Zaoterdig 2 Mieërt Aafhaole JeugPrins(es) aansjloëtend Vastelaovesmis en Jeugprinse recepsie
  • Zondig 3 Mieërt Aafhaole Prins, aansjloëtend recepsie etc
  • Maondig 4 Mieërt Vastelaovesmaondig, Optog
  • Dinsdig 5 Mieërt Boérebroelof
  • Woensdig 6 Mieërt Aswoensdig
  • Woensdig 6 Mieërt Hiëringsjelle

Programma