Ter naogedachtenis
Antoon Tissen
Antoon Tissen, in Baolder baeter bekend as Toeën of Ties. Hae meug den wel van gebaorte ‘ne Hout-Blieërickse zien, hae is al jaorelank ’n bekend en vertroewd gezich in ‘t Baolderse Kookelank.
In 1989 kwaam Ties as adjudant van Erik Niederheide same mèt Jos Knippenberg beej de Kook. Hae bleef daonao beej de club, kwaam beej de raod van 11 en zörgde d’r as penningmeister van de beerdragers veur det nemes dors heufde te lieje. Ties waas jaorelank veurzitter van de Technische Commissie en zoot 11 jaor in ‘t besjtuuer van de Kook. Wao hae in 2008 veur gehuldigd woort.
In dae zelfden tied vóng hae ‘t tied öm plaats te make veur jónk blood in ’t besjtuuer. Ties besjloot ‘t get röstiger aan te gaon doon, as óngekostumeerd lid op de achtergrónk. Hae is den ouch zieër verdeend beneump as ieërelid van de Kook en van de Technische Commissie nao 30 jaor lidmaatsjap.
As ieërelid van de TC bleef hae echter actief. Waas d’r ‘ne vrachwage, tractor of heftruuk nuuedig, Ties zörgde der veur. Jaore lang reej hae de Prinsewage door waer en wink door de Baolderse sjtraote. Ouch waas hae daegene dae de contacte haet gelag met de motorclub in Bels, die nou al jaore lang ózze Prinsewage bouwe. Ties is óndanks det zien gezónkheid al behuuerlik te wense euver leet toet en mèt de lètste aangekochte wage mei nao Bels gewaes um sjerp te óngerhandele en sjaele wazel te verkoupe. Netuurlik ónger ’t genot van de nuuedige Jupilerkes !
Helaas ging Ties zien gezónkheid sjtieëds vaerder achteroet en zoge we Ties stjieëds minder. Mer via de appgroep is hae toet ‘t lets toe nauw betrokke gebleve beej de TC, oeteraard met de nuuedige humor. Ties, weej haope des se nów op ós lèts van dao baove oet, en nów dao de sjtumming d’r in geis haoje.
Hojje Ties.
Frans van Heur
Helaas is ós wir eine troewe Vastelaovesvierder ontvalle. Vuuels te vreug is van ós haergegaon Frans van Heur. ‘T allein zien veel ‘m zjwaor. Nao jaorelang sirremoniemeister van de Kook te zien gewaes haet Frans in 1986 de skepter van regelateur van de Kook euvergedrage aan Arno Janssen. Frans waas onnaovolgbaar in zien zieër attente en sjerpe opmerkinge as hae op de bühne sjtóng. Dao vulde hae zich den ouch good thoes. In 1991 zjwaaide Frans de skepter euver ’t Kookeriek as Prins Frans II. Ouch heej waas hae altied erg attent mèt zien opmerkinge wat altied erg gewaardeerd woord. We zulle Frans as Vastelaovesvierder erg gaon misse. Neet allein beej de Kook met zeker ouch beej de Aod Prinse wao Frans die aoj garde altied wel aan ’t lache kreeg ondanks zien ziekte. Vur de kenners van de Baolderse Vastelaovend res mich ein Vastelaoveskonklusie “Sjeng en Sjraar” zien wir beejein
Arno Janssen
In Arno Janssen verluus Baolder eine Carnavalist in hert en niere. Nao in 1980 Adjudant te zien gewaes is Arno 2 jaor later toegetraoje toet ’t besjteur waonao Arno in 1987 Frans van Heur opvolgde as sirremoniemeister. Dees taak haet Arno jaorelang streng doch rechvaerdig volbrach. Had altied ein wäördje klaor en waas zieër gevat en sjerp met zien opmerkinge. En det alles met de nuuedige humor. Arno is altied eine Kook aanhanger gebleve en waas regelmaotig present op de versjillende activiteite van de kook. Weej winse Tiny, Coen, Bas, Ellen en kleinkinger hiel vuuel sjterkte toe in deze
moejliken tied. Names ’t besteur en leje van Vastelaovesvereiniging de kook.
Wiel Hoezen
Ein van de oprichters van Vastelaovesvereiniging “de Kook” Wiel Hoeze haet is in de gezaegende leeftied van 87 jaor nao ein kort ziekbed mótte verlaote. Wiel waas in 1965 ein van de mede-oprichters van de kook. Nao zien actieve inzet veur de Kook is Wiel wies d’n daag van vandaag lid van de Kook gebleve. As besiteurslid was hae altied hiel actief beej ’t organizere van de diverse activiteite. Zoeë zörgde hae d’r veur det d’n optoch good verleep en alle deilnimmers de nuuedige aandach krege. Ouch as penningmeister letde Wiel altied good op de kleintjes er woort d’r noeits te vuuel oetgegaeve. Eine man die de Vastelaovend in Baolder ein werm hert toedroog en wao we now nog vuuel aan te danke höbbe. Nao zien actieve lidmaatsjap woort Wiel beneump toet leërelid en ware Wiel en Miep nog op alle Pronkzittinge van de Kook aanwezig. De pronkzittinge welke Wiel jaore lang as besiteurslid organiseerde. Dit jaor zuuj Wiel de 60e Pronkzitting belaeve. Mer helaas, door ein kortsjtóndige ziekte is det d’r neet mieër van meuge komme. Names de Kook danke weej Wiel (en Miep) veur de jaorelange inzet veur de Kook en winse weej Miep, de kinger, kleinkinger en euverige femilieleje hiel vuuel sjterkte toe in deze moeiliken tied. We zullen ‘m zeker gaon misse.